काठमाण्डौ । घोराही सिमेन्ट इन्डस्ट्रीको आईपीओ असार ३ गते बिहानसम्म २ गुणा बढीले ओभरसब्सक्राइब्ड भइसकेको छ।
यो कम्पनीले गत जेठ ३२ गतेदेखि सर्वसाधारणका लागि आईपीओ बिक्री खुला गरेको थियो। कुल ६९ लाख ११ हजार ६७० कित्ता आईपीओ बिक्री खुला गरेको हो। यसमा स्थानीय, विदेशमा रहेका नेपाली श्रमिक, सामूहिक लगानी कोष र कर्मचारीलाई छुट्याएर बाँडफाँड गरेपछि बाँकी रहेको ८ लाख ७४ हजार ३८२ कित्तासमेत थपिएको छ।
यो आईपीओमा प्रतिकित्ता ४३५ रुपैयाँ दरका आवेदन दिनुपर्नेछ। जसमा कम्पनीले अंकित मूल्य १०० रुपैयाँमा ३३५ रुपैयाँ प्रिमियम मूल्य थपेको छ।
सीडीएससीका अनुसार आज बिहान १० बजेसम्म यो आईपीओमा ३ लाख ९२ हजार २६७ आवेदकबाट कुल १ करोड ४० लाख ५८ हजार ६१० कित्ता सेयर माग भएको छ। जुन मागभन्दा २.०३ गुणाले बढी हो।
मागभन्दा बढी आवेदन परेकै कारण यो आईपीओ पनि गोलाप्रथाबाट बाँडफाँड हुनेछ। जसमा ६ लाख ९१ हजार १६७ आवेदकले १० कित्ता सेयरका लागि दरले पाउनेछन्।
घोराही सिमेन्टको आईपीओमा न्यूनतम १० कित्तादेखि अधिकतम १० लाख कित्ताका लागि आवेदन दिन सकिनेछ।
लगानीकर्ताले नेपाल धितोपत्र बोर्डबाट सी–आस्बा सेवामा सहभागी बैंक तथा वित्तीय संस्था तथा तिनले तोकेका शाखा र सीडीएससीको मेरो सेयरबाट आवेदन दिन सक्नेछन्।
यो आईपीओको निष्कासन बन्द भोलि असार ४ गते बैंकिङ समयपछि हुनेछ।
घोराही सिमेन्टको आईपीओ बिक्री प्रबन्धकमा नबिल इन्भेस्टमेन्ट बैंकिङ र हिमालयन क्यापिटल रहेका छन्।
